中央宣佈全面開放二孩政策，兒童用品股同乳業股應聲炒上，不過昨日已經碌番晒落去。
睇番兩年前嘅三中全會，中央計劃啟動單獨二胎，容許一方係獨生子女嘅夫婦生兩胎，不過，相關股份炒唔夠一個月就散水。
事實亦證明單獨二胎對刺激出生率作用暫時不大，由於前車可鑑，唔少分析都質疑啱啱宣佈嘅二孩政策成效有幾大。
大行傑富瑞（Jefferies）話無論係短期定中期，都唔信措施會有顯著成效，因為大部份八、九十後都係獨生子女，符合單獨二胎資格，所以受惠二孩政策嘅都係已過生育高峯期嘅七十後。
其實傑富瑞喺兩年前單獨二胎啟動前曾經出過報告，指嬰兒配方同紙尿片行業，應該可適度受惠於單獨二胎，但當時已對單獨二胎嘅睇法隱約有保留，話居住同生育成本上升，或者會令部份家庭拒絕生多一個，而且早於90年代後期，部份省份已經容許雙方都係獨生子女嘅夫婦生多一個。
兩年前單獨二胎推出前，另一大行瑞銀曾睇好恒安（1044）可望受惠，不過該行上周五已經話，放寬生育政策可以增加出生率，並喺未來幾年刺激同養細路相關嘅開支，但有關影響短期相當有限。
瑞銀本周一又出報告，話二孩政策難以抵銷乳業下行風險，理據同傑富瑞差唔多，都係話，大部份頂級城市嘅夫婦都已經符合單獨二胎資格，新措施主要只會喺一啲未實施單獨二胎嘅較落後地區先有其影響。
之後仲會唔會有大行跟住轉軚？大家可以拭目以待啦！
El.
本欄逢周二、四、五刊出