「小賭王」何猷龍最近可以話獲群星拱照，佢旗下澳門新濠影匯上星期開幕，搵嚟荷李活巨星羅拔迪尼路與里安納度狄卡比奧到場，下星期就輪到有「大哨」之稱嘅巴西球星朗拿度，去佢間新濠天地賭番兩手。
澳門新濠天地正舉行2015年亞洲撲克錦標賽，賽期由上月30日至本月15日。掛靴後轉為鑽研賭術嘅朗拿度，將首度現身澳門參賽，下周一參加參賽金為10萬元嘅主賽事，佢場賽事喺當日下晝舉行。
今年初，朗拿度喺2015 PokerStars加勒比探險賽（PCA）嘅主賽事，贏得32.9萬元獎金，成為一時佳話。佢之後講過，希望喺撲克牌桌上獲得更多成功。真係估唔到39歲嘅朗拿度做完球星，𠵱家竟然想做賭神，遲吓會否想做埋股神呀。