香港警察上個月開咗個官方面書戶口同市民交流吓，又有「四點鐘許sir」孭飛，都有四萬幾個讚好㗎；其實海外唔少警察部門都有自己嘅twitter同面書戶口，但英國默西賽德郡警局就玩出事，將新特蘭周日英超大敗當做被姦嚟搞笑，結果要道歉收場。
拖肥炒6:2 黑貓「甩晒褲」
周日英超，「拖肥」愛華頓主場憑前鋒干尼連中三元，6:2大炒新特蘭，令「黑貓」領隊艾拿迪斯錄得上任後最大敗仗；一場入六粒，球迷班頓就拎嚟開玩笑，喺默郡警局官方twitter度留言：「我想匯報一單強姦案，11月1日三點鐘喺葛迪遜公園（愛華頓主場）發生。」新特蘭後衞布朗、門將彭迪利蒙等俾人玩到殘，已經好唔開心，勢估唔到連默郡警方都抽水回覆：「雖然新特蘭都輸到甩晒褲，不過我哋肯定呢度冇強姦案發生。」
其實幽默都係英國人傳統，好似車路士球迷都識自嘲，一個叫阿歷士嘅球迷就話：「我都有單案想匯報好耐。車路士場場都俾人強姦，你可唔可以幫吓手？」默郡警方就回應話唔係刑事罪行，所以幫唔到手；點知唔少衞道之士出嚟鬧默郡警察唔可以拎強姦嚟玩，又會傷害以往受強姦人士嘅感情，搞到警方周日晚要出嚟道歉（小圖）。
朗尼冇態警列失蹤人口
鍾意玩嘢嘅仲有大曼徹斯特警方，佢哋又喺官方twitter抽曼聯前鋒朗尼水，出咗個尋人聲明，話一位叫朗尼嘅男子失蹤，最後一次出現係着紅色衫，搵到佢就通知警方，結果俾曼聯球迷群起反擊。講真朗尼又係唔抵幫，上場作客水晶宮冇咩建樹，搞到球隊悶和0:0；不過，就算表現麻麻，朗尼仍然係體育用品商寵兒，今季搶走曼聯球衣贊助嘅三間，仲想喺一剔手上搶埋朗尼，兼開到450萬鎊（約5,400萬港元）一年代言費，只係比三間最高價球星加里夫巴利少100萬鎊，銀彈政策又會唔會打動到呢位曼聯兼英格蘭隊長呢？