桃花旺盛的林芊妤（Coffee）除了與江湖中人特別有緣，又先後兩次被本報影到與半億身家中佬Jeff孖咇逛街，不過去年6月跟Coffee在ifc「廁格gathering」的林知譽（Will），桃花比Coffee更旺，明年初將會迎娶已故「針織大王」羅定邦孫女、百樂集團主席羅家寶女兒羅穎怡（Wendy），恭喜！恭喜！
現年32歲的Will，父親是市值9億上市公司、達利國際集團創辦人林富華，他則擔任集團旗下達利製衣有限公司董事。知情者向《蘋果》報料說：「Wendy今年35歲，大過Will 3年，雖然Will年紀細Wendy少少，但兩個人屋企都係做生意，大家背景又差唔多，所以兩個人好夾，好多話題，可以話係一見鍾情，拍咗拖半年多啲，Will趁Wendy今年9月生日向佢求婚，估唔到一次就成功咗。」
九巴後人做搞手
不過，「雙W」由決定結婚到籌備婚禮，原來都好「頭痕」，全因為Will去年與Coffee的廁格事件太轟動，知情者透露：「Will好驚俾記者知道結婚消息，佢唔想影響到Wendy，本來諗住一切從簡，兩個人去外國結婚，再同屋企人食餐飯就算，Wendy都贊成咗，但雙方屋企都有頭有面，唔想娶新抱同嫁女要搞到咁鬼祟，所以最後都決定喺香港擺酒，婚宴定咗喺明年初舉行，仲搵咗九巴後人雷怡暉幫手做公關應付記者。」
前度結婚了，新娘不是我，Coffee昨日接受本報訪問時表示：「其實好耐冇同佢（Will）聯絡過，如果佢真係結婚就恭喜佢啦，佢有佢嘅新生活，又就嚟結婚，希望佢哋會幸福快樂啦！」
另外，今次婚禮搞手雷怡暉昨接受本報電話訪問時則表示：「哎吔，唔講得，暫時冇嘢講，遲啲同你講吖，我𠵱家要開會，拜拜！」
採訪：小米、羅慧敏
