區議會同立法會選舉前夕，阿爺梗係想香港搞多啲凝聚唔同界別嘅組織，以便喺需要時發揮實際功用。
噚日又有一個獲北京支持嘅團體誕生，身兼全國政協委員嘅廠商會前會長施榮懷牽頭成立香港北京交流協進會，陣容星光熠熠，名譽會長包括吳光正、李家傑同黃志祥等猛人，賭王何鴻燊千金何超瓊更擔任四名副會長之一，同施榮懷拍住上搞好阿爺嘅新baby。
查實賭后有份喺個會打骰，皆因佢係北京市政協常委，梗係要幫手搞吓活動，深化港京兩地嘅交流同合作。何超瓊噚日亦以主人家身份，接待包括全國政協副主席董建華、中聯辦主任張曉明及特首梁振英等嘉賓，何超瓊喺致辭環節更獲安排代表北京市政協主席發言㖭呀，可見地位舉足輕重。
廣東話致辭 與別不同
不得不提嘅係，唔少嘉賓致辭時用普通話，個個千篇一律話支持特區施政，但賭后代表北京市政協主席致辭時卻講廣東話喎，認真與別不同。
身為會長嘅施榮懷就話喎，希望藉住呢個平台，為團結兩地人士發揮橋樑作用，擴大交流兼引導社會參與更多港京嘅經濟發展同建設。八方聽聞，佢哋嘅會名特別安排香港先過北京，皆因始終係香港發起，要分吓莊閒嘅。八方現場所見，到場祝賀嘅全國政協常委唐英年一度同董建華密密傾，唔知有乜咁好傾？
李八方
mailto:[email protected]