體壇拾趣：
馬刺三巨頭創常勝紀錄

馬刺喺禮拜日作客塞爾特人嘅常規賽，以95:87贏波；而「三巨頭」鄧肯（Tim Duncan）、真路比利（Manu Ginobili）同柏加（Tony Parker）呢個已經合作咗14年嘅組合，就憑住呢場比賽拎到佢哋職業生涯中第541場常規賽勝仗，打破當年由塞爾特人名宿小鳥布特（Larry Bird）、酋長巴利殊（Robert Parish）同現任火箭主帥麥希（Kevin McHale）一齊贏540場常規賽嘅紀錄，成為史上最強嘅三人組合。

挫塞軍奪541場勝仗

賽後，馬刺官方twitter仲特別上載咗張三巨頭啱啱加入球隊嘅舊相、同𠵱家嘅近照，話：「一齊創造歷史。」雖然隨住時間流逝，佢哋三個嘅外貌變老咗，但佢地之間嘅感情同樣變得更好；柏加見到張相之後，都忍唔住話：「可以同呢兩個隊友一齊創造歷史，贏到541場常規賽，真係太神奇喇！」
39歲嘅鄧肯今季以超低價同馬刺續約兩年，假如佢同柏加、真路比利三個都保持身體健康，呢兩年可以打足全季嘅話，隨時都有可能將佢哋嘅獲勝紀錄改寫到600場或以上。同時，由97/98以狀元身份加盟馬刺嘅最強老將鄧肯，同聯盟中嘅最佳教練普波域治（Gregg Popovich），不經不覺都合作咗19年；佢哋亦都聯手拎咗953場勝仗，係聯盟中贏到最多常規賽嘅師徒檔㖭。