講咗N次唔選特首嘅立法會主席曾鈺成，每次現身都被追問會唔會選特首。噚日佢出席論壇，主持人問佢係咪真係唔選？佢笑住話：「我以前講嘅嘢，你真係唔好信呀。」台下即時拍手，明顯希望佢選。佢事後梗係俾傳媒問係咪想選特首啦，佢對住鏡頭再次說不，仲叫記者唔好問：「梗係唔會選，講咗好多次。（我）不具備參選嘅條件，亦不具備做行政長官嘅條件，希望唔好再問。」
同場另一位盛傳好想做特首嘅新民黨主席葉劉淑儀，就被問到若果可以解決香港教育問題，佢會做啲乜？葉劉話喎，佢一定會執過晒啲課程，要學生多讀經典、提高番讀中國文學同英國文學嘅人數喎。唔知教育界聽完佢咁講，撐唔撐佢做特首呢？