商務及經濟發展局局長蘇錦樑呢輪被創科局撥款、旅客死亡案搞到頭都大，噚日出席「渣打香港中小企領先營商指數」中小企智囊論壇，明顯輕鬆得多。同場仲有剛剛卸任工業總會主席，轉任生產力促進局主席嘅劉展灝，同埋渣打香港行政總裁陳秀梅，三人輪流發言。
蘇錦樑一上台就棄用大會預備嘅講台，講笑話「排第三致辭最唔好，就係想講嘅已經被前兩位（陳秀梅、劉展灝）講晒。」佢惟有將自己少年時代嘅軼事擺上枱，話「小弟喺加拿大讀書，16歲開始揸車」，於是深明保養副偈幾咁重要，以此比喻政策協助工商界，起到偈油潤滑作用云云。
蘇錦樑夠晒風騷，反而陳秀梅可能因為渣打炒人風雨多，加上今日放榜公佈業績，有啲心不在焉，完場就急急腳走人。