聖誕節要甜蜜拍拖之餘，又想實踐理性消費？動吓腦筋就可以！香港家庭計劃指導會嘅青年性教育義工組「家義豚」會喺12月13日下午1點至5點，舉辦名為「慳多啲啦baby！約會大作戰」活動，歡迎16至30歲嘅情侶參加，鼓勵佢哋構思一個別出心裁又有意義嘅低消費約會。
參加者首先要喺偽藝文青、異國風情、低俗浪漫、火辣夏日、拉上雲端或其他題目，按主題設計以$131.2（寓意一心一意）為限嘅4粒鐘拍拖活動，其間要執行一項神秘任務，考驗情侶相處之道，家計會將安排義工同行，記錄參加者嘅約會支出同評定任務係咪成功。拍拖實際支出最接近$131.2嘅情侶就奪得慳多啲Babies大獎，我最喜愛的約會行程大獎則由市民網上公投。活動本月20日截止報名，詳情可參閱 https://goo.gl/VZdZiM 。