熱血公民派出6人參選區議會，當中5人同民主黨撞區，唯一同建制對撼嘅係出戰元州及蘇屋選區嘅方智龍，對手係民建聯陳偉明。方智龍選擇呢區上陣，其中一個原因係過去兩年都有喺深水埗、長沙灣一帶以捕捉、絕育、放回方式協助流浪貓，加上當區係食水含鉛重災區，偏偏對手所屬嘅民建聯喺立法會否決以特權法徹查事件，希望透過參選畀居民多個選擇喎。
一般政黨造勢，不外乎搞吓大型集會，但熱血幾位候選人同埋黃洋達等人，噚日就去咗深水埗關帝廟上香，祈求保佑過關斬將。黃洋達話組織成員過去因抗爭而受政治檢控同不公義打壓，傘運後更明白抗爭要講道義，因過去曾俾社運人士「篤灰」，令抗爭者面對牢獄之苦，不時都會拜關公以彰義氣喎。