立法會財委會今個周五繼續審議成立創新及科技局嘅撥款，財委會主席陳健波預告，當日通過撥款機會極大，估計4粒鐘就搞掂。點解咁有信心？之唔係因為佢已經提前剪布，拒絕激進泛民提出嘅過千項修正案。
講到裁決受爭議，一上任就發威嘅陳健波噚日喺一個電視節目話，有關決定合情合法合理，強調上屆財委會多次加會都未能表決撥款，「永遠被牽住鼻子走」，證明同議員講數無效，而早前法庭裁定財委會主席有權控制會議進程，有助議會運作順暢。
升呢後嘅陳健波，似乎變身埋成語王，以16字總結財委會會議：「欲速不達，先禮後兵，仁至義盡，水到渠成。」佢呼籲政府回應問題時都唔好遊花園，否則都唔會放過政府喎。