國泰舊年10月換咗新logo，舊版係白icon綠底下面加紅線，新logo係全綠底加白icon，紅線冇咗，國泰前排仲幫其中一隻波音777客機換機身設計，噚日特登邀請傳媒同一批市民入禁區睇吓新look有幾特別。
新look驟眼睇同以往變動唔大，細心啲對比先見到機頭本身有條墨綠色間條，𠵱家變咗淡綠色；英文名Cathay個C同Pacific個P本來高身啲，變成全部字母一樣高度；機尾就直接換咗新logo，國泰CEO朱國樑話要用5年時間幫全部飛機換新look。
咦，外表換新裝之時、內櫳換唔換？據聞國泰諗住將經濟客位再整窄啲，加多啲位落去喎？朱國樑大派定心丸話公司冇呢個計劃，長腿同高人一族可以安心咯。