科技界做得快未必好世界，諾基亞同黑莓都做過手機界第一，最後被蘋果iPhone同三星追上。GoPro已成為運動相機嘅代名詞，喺納斯達克掛牌半年內，由招股價24美元飆升至高位98美元，升呢做埋倍升股。GoPro上個星期五股價幾乎打回原形，逼近招股價24美元，今年更累跌六成。
GoPro墜機失事因業務有變，公司面臨增長見頂威脅，佔收入一半嘅美國市場按季跌一成幾，亞太區收入亦較上季跌超過兩成。期內庫存總值勁增32%至2.89億美元，存貨周轉速度大減，由次季87日增至122日。GoPro解釋新機Hero 4 Session銷情不如理想，打唔入大眾市場。運動相機市場有Sony及小米急起直追，雖然GoPro喺運動相機市佔率接近50%，但打格價戰已經先輸一仗。新機價錢的確唔親民，盛惠399美元，折合三千幾港紙。對比市面上其他入門級嘅運動相機貴一截，例如擺明挑機嘅小蟻標價399人仔。
功能方面，GoPro新機欠缺4K高清拍攝亦大削吸引力。GoPro為順應消費者民意自動減價100美元促銷，相信只有短暫刺激。公司將專注開發航拍同虛擬實景拍攝，研發開支又要燒一筆； 同時又要搞好銷售去庫存，GoPro想重現爆升之路仍屬未知之數，創新要夠勇外，其實更要講有冇運。
C+B
本欄逢周一刊出