這天快活谷日賽有三大特色，包括組合獨贏唔係開A1就是A2、好多雙位數大冧巴馬win，以及內檔馬威晒。
結果到了第七場三班一哩，一次過睇晒呢三樣嘢，全場最大冧巴12號姚廐馬「勁新鮮」，夥拍田泰安於4檔起步，沿途均速放頭跑主動，拉士雖被方廐「贏到爆」在潘頓胯下追到褲甩，但「勁新鮮」都可以堅持到底率先衝線，順利以8.4倍半冷門身份開齋，其所屬之A2組合獨贏則派28元。
「勁新鮮」馬主好業主團體成員，包括板長壽司老闆鄭威濤、米蘭站老闆姚君達等，但兩人均無現身，由另一成員董惠華主持大局，此駒苦戰至第三季第24仗，終於響勝鼓，田泰安更連續贏到第四次賽事共取六win。
反觀潘頓同方嘉柏組合就唔多夠運，「贏到爆」留放一絕都輸唔到屈居亞軍，跑第三係韋達座騎「駿將」，此駒一連四場一勝三位，演出準繩，第四名係「紅海灣」，四重彩派六萬蚊鬆啲。
今場最慘是過去7戰2冠4亞賽績極佳之「有心人」，增程初跑一哩仍熱到2倍，但在雷神胯下冇前冇後，逾1,500萬ＷＰ投注額瓜晒。