最近唔少喺中環返工嘅朋友，食晏時都話要去食雪糕，原來上個月喺蛇王芬附近，新開一間美式雪糕店。有日食晏時間走去望一望，果然排晒隊，男女老少都有，認真誇張。
呢間來自美國波士頓嘅雪糕店Emack & Bolio's，最大特色就係雪糕層層叠（一球雪糕43元，之後每球20元），雪糕筒又夠晒色彩繽紛（特色筒要加錢），影相放上facebook，呃like一流。華華買呢款兩球雪糕加特色脆筒盛惠83元，食完唔使食飯，仲要跑番兩個圈！
雪糕店其中一位老闆Raymond，本身喺擺花街有間英式糖果店。佢指，Emack & Bolio's全球有超過35間分店，其中有6間喺泰國，佢拍檔去泰國旅行見到店內大排長龍，覺得可以引入香港，於是搵美國方面傾合作。
夏天最多人想食雪糕，佢哋原本都希望今年中開業，但因手續問題，延至上月。面對天氣逐漸轉涼，Raymond都有少少擔心生意轉差，不過好多生意都有季節性問題，其實都唔擔心得咁多，佢哋亦已經諗緊，明年初再開分店。