【沙田】英皇力捧藝人陳家樂，舊年喺台灣拍攝電影《破風》跌斷鎖骨後知名度大增，就連感情方面亦發展順利。今年初佢因為拍攝港台劇集《總有出頭天》而跟22歲長腿女模余香凝（Jennifer）撻着，二人不時孖住出巡相當甜蜜，繼月前被傳媒拍到喺港鐵車廂調情後，上星期三本報記者又發現佢哋拍拖到759阿信屋掃零食，家樂仲趁冇人留意時一手攬實女友，認真冤氣。
「唔係一齊住」
着上超短褲大晒長腿嘅Jennifer，當日下午5點幾同陳家樂現身沙田瀝源廣場759阿信屋，為食Jennifer不停揀薯片，揀完一包又一包，家樂見狀即忍唔住笑佢：「食唔晒咪又要我食埋一份！」之後二人再揀選其他零食，突然家樂一手攬住女友，然後密密斟，表現甜蜜，但當發現途人漸多，佢哋又顯得避忌並刻意彈開，而逛足半粒鐘後，家樂同女友買咗朱古力、薯片同寶礦力等零食同飲品，由女友找數，繼而肩並肩離開。
記者噚日致電家樂，問佢同女友係咪發展到同居關係時，家樂急急澄清話：「唔係，嗰日去佢屋企，買啲零食上去之嘛，唔係一齊住。」究竟佢哋拍咗拖幾耐？家樂笑話：「今年2月開始，都穩定嘅。」此外，家樂同湯怡日前出席德國女攝影師Ellen Von Unwerth於上海舉行嘅試驗性攝影展，獲Ellen大讚靚仔靚女。
採訪、攝影：梁繼光
