【區選2015】
【本報訊】家住山頂兼是大律師，25歲的林作突然在黃大仙龍星選區參加區選，外界對其動機相當多疑問。去年以622萬元購入星河明居一單位的林作聲言喜歡接觸「地氣」，冀領香港重回中間路線；爭取連任的譚香文則斥林作獲建制派團體支持卻扮獨立。林作對獲建制支持不以為然，反憂名字與十優狀元港姐掛鈎，對選情有負面影響。
記者：許偉賢 白 琳
根據土地註冊處資料，林作去年7月以622萬元購入龍星選區內的星河明居低層656呎單位。家住半山的他為了參選而一擲數百萬元置業？林作受訪時說，買樓是看好屋苑升值潛力，入住後卻愛上此區，算是誤打誤撞在此展開從政之路。高薪厚職卻選區議員，難怪令人對其動機存疑，林作堅稱落街接觸街坊是開心事：「有啲富二代唔開心，因為佢哋缺乏同社會接觸，我自己唔係話貪靚、尋歡就開心，作為大律師，成日坐喺office諗嘢、寫嘢，有時候調劑吓，出嚟同人傾吓偈，尤其係街坊，接觸吓啲地氣，嗰種feel真係正㗎。」
被質疑建制扮獨立
他指佔中令香港社會撕裂，希望透過議會工作令香港出現第三種聲音。報稱獨立的他獲建制組織東九龍居民委員會力撐，今年5月又與政協陳勇前派花。譚香文指林作扮獨立，質疑建制派背後發功為林助選：「如果佢（林）係獨立，建制派又使乜咁緊張？」
林作直認獲建制團體支持，原因是當區有反現任議員的強烈情緒，「我感覺得到係有邊個新人出嚟參選，佢哋都會撐」，並指「獨立呢條路，唔代表孤立，邊一邊嘅人都唔做（合作）」。問及十優港姐麥明詩男友身份令他頻頻見報，林作坦言有負面影響，「會畀人一種你係咪嚟做嘢、定係你係娛樂人嘅感覺」。
本身是會計師的譚香文2003年當選龍星區議員，2007年敗於九龍社團聯會支持的蔡六乘，2011年復仇成功，但只以2,862票險勝獲2,809票的蔡六乘。今次面對獲建制支持的大狀對手，身為人民力量成員、今次以前綫名義出選的譚選情不樂觀，她強調在當區居住多年，地區政績豐厚，包括成功爭取凍結星河明居管理費、活化龍蟠苑商場等，質疑林作地區工作欠奉：「如果你係忽然民主、忽然空降、忽然話住喺呢度，我相信市民會睇清楚，究竟你有冇實質成績表攞出嚟畀人睇。」
林作自言關注區內交通問題，例如星河明居外的交通擠塞情況，「橋都諗埋，但我唔會講出嚟」，聲稱避免對手抄橋，又指居民不喜歡地區事務政治化。譚香文則稱街坊眼睛雪亮，料支持傘運不影響選情，「我日日辛勞做地區工作，市民有目共睹」。
同區尚有報稱獨立的中藥店長岳敬寬，以及報稱無黨派的文員何偉權。本報曾致電岳敬寬，截稿前未有回覆；何偉權則未能聯絡。
