勇士嘅當家球星「咖喱仔」史堤芬居里（Stephen Curry）喺新球季，決定用行動嚟回應外界對佢喺上季唔夠資格拎最有價值球員（MVP）嘅質疑；佢喺上個禮拜六勇士作客塘鵝嘅NBA常規賽轟入53分，成為聯盟今季第一個得分超過50嘅球員，幫球隊以134:120贏波；而塘鵝雖然有「一眉」安東尼戴維斯（Anthony Davis）入咗26分同搶到15個籃板，但最終都係輸波收場。
咖喱仔今仗上陣35分鐘，全場起手27次，射入咗17球，包括八個三分波，罰球更加係11射全中，個人獨得53分；佢除咗成為聯盟今季第一個得分超過50嘅球員外，亦都創下三項紀錄；佢喺開季頭三場比賽夾埋入咗118分，成為繼湖人名宿張伯倫（Wilt Chamberlain）、庇拿（Elgin Baylor）、「波神」米高佐敦（Michael Jordan）同路易士（Rashard Lewis）之後，史上第五位可以喺開季頭三場比賽夾埋入多過50分嘅球員；佢亦都係自波神MJ喺89/90球季後，首名可以喺頭三場常規賽合共轟入118分嘅球員。
破盡紀錄回應質疑
而咖喱仔喺今場比賽嘅第三節入咗28分，係佢職業生涯中單節得分嘅新高，值得留意嘅係，喺第三節，佢一個人嘅得分，仲多過塘鵝全隊夾埋拎到嘅26分。
雖然喺今季NBA開鑼前，無論係球隊嘅總經理或者球員，都唔相信咖喱仔可以繼續打出好表現，但佢似乎並未受到外界對自己嘅質疑所影響；佢喺帶領勇士贏得開季三連勝後表示：「所有人都認為勇士上季唔夠實力贏總冠軍，所有人都認為我上季唔夠實力贏MVP；但我覺得一切都冇所謂，我只係想今季可以表現得比上季好，而我喺呢幾年內，會不斷搵方法令自己嘅表現變得更好。」
而對於咖喱仔今場嘅表現，佢啲隊友都讚不絕口；史比基斯（Marreese Speights）話聯盟𠵱家已經可以將今季嘅MVP提前頒畀佢，而祖蒙特格連（Draymond Green）更忍唔住喺場上同佢講：「你嘅表現勁到好似將成個聯盟，變到只係屬於你一個人咁。」