東華三院為咗慶祝創院145周年，噚日喺上環搞咗個歷來最大型嘅文武二帝大型巡遊活動，吸引到熱愛中國文化嘅美國駐港總領事夏千福到場參加開幕禮，仲欣賞咗現場嘅醒獅表演。雖然佢冇份喺台上為醒獅點睛，但台下嘅佢都睇得好興奮。
電音三太子跳街舞
其實呢次巡遊係東院歷來第三次、亦係規模最大嘅一次，對上一次已經係約77年前，第一次巡遊就喺1872年東華醫院成立之時舉行。今次要請文武二帝出巡真係唔易，大會特別為二帝新做咗一對盛載佢哋嘅「鑾輿」，難怪連勞工及福利局局長張建宗都話今次巡遊好有歷史意義，希望東院年年搞，變成香港盛事，仲話要搵盛事基金大力推動。東院主席何超蕸就話對張建宗嘅建議感興趣，但係咪成事就由董事局決定啦。
今次巡遊有500幾人參加，由上環摩利臣街行到文武廟，再進行秋祭活動，沿途除咗有醒獅表演，仲有近年響台灣興起、結合現代文化同古代風俗嘅「電音三太子」表演，佢哋打扮出位，着住古裝但手戴米奇老鼠手套，同年輕人大跳街舞，吸引大批市民爭住同佢哋自拍。