張智霖（Chilam）、莊思敏同梁健平等，噚日喺旺角街頭宣傳電影《十月初五的月光》，現場起碼有500人圍觀，唔知係咪因為有杏仁餅送嘅關係呢？不過佢哋貪方便，就咁將啲餅拋出去，搞到現場大亂，連台邊嘅大喇叭都差啲推跌晒，好彩冇變成人踩人意外，但都好危險。因為場面近乎失控，電影公司即刻採取應變措施，安排演員去附近食肆做訪問。Chilam話：「好彩冇事，人多嘅地方真係好易有危險，大家真係要注意安全，所以我走時都係9秒9極速離開。」
坐港鐵冇人理
Chilam講笑話多次提議喺商場搞活動，冇咁危險之餘又有冷氣唔使熱。佢仲笑住話：「我出活動時，啲fans更熱情，反而坐地鐵，個個顧住玩電話，冇人見到我。」同場莊思敏話：「走嗰陣我直情俾自己公司保安推開，可能佢哋眼中只有Chilam一個。」講到有傳佢爸爸身體不適要嚟港醫病？莊思敏好避忌咁話：「老人家點都會有老人病，不過OK嘅，佢𠵱家喺馬來西亞休養，多謝大家關心。」
撰文：馮仁昭
