一提起AO歌王，唔少人會諗起民政事務局前常任秘書長楊立門，但查實官場現存嘅靚聲王都唔少，好似政制及內地事務局局長譚志源Raymond，係人都知道佢唱得兩嘴，尤其係經典電視劇主題曲，一定難唔到佢。而好多經典電視劇主題曲，都係由顧嘉煇作曲㗎噃，所以Raymond日前喺禮賓府嘅授勳典禮上，遇上獲頒授金紫荊星章嘅煇哥，就好似粉絲見到偶像咁興奮，仲邀請對方合照。Raymond話呀，「與偶像合照，勁開心，恭喜晒煇哥」。唔知煇哥會唔會為Raymond度身訂做一首熱廚房金曲呢？