政務司司長林鄭月娥最近為處理鉛水而捱轟嘅公務員抱不平，講到「官到無求膽自大」，惹嚟外界唔少批評，噚日佢朝早出席明愛賣物會活動時有感而發，大嘆家陣喺政府，若果堅持做「正義」工作往往會被責難，仲意有所指話《聖經》真福八端中嘅「為義被難真有福」好啱自己，「因為天堂已經預咗個位畀我」。
睇番政府新聞處之後發放嘅林鄭致辭全文，卻冇咗呢段發言喎，林鄭嘅新聞秘書話，因為有關言論係爆肚，一般都唔會加入新聞稿。查實身為天主教徒嘅林鄭去賣物會活動前去咗教堂望彌撒，佢致辭時都話，彌撒中聽到包括真福八端等福音，引述有人話當中嘅第八端非常適合佢：「為義被難真有福，因為天堂已經預咗個位畀我。」佢慨嘆：「事實上今日做特區政府呢，要堅持做一啲正義嘅工作，經常都會被責難嘅。」
曾鈺成隔空安撫
真福八端除咗「為義而受迫害的人是有福的，因為天國是他們的」，仲有「哀慟的人是有福的，因為他們要受安慰」等；到底因為乜事令林鄭感觸良多？有記者都喺現場問過林鄭，但佢唔肯再多講心聲。至於聲稱天堂都預咗位畀自己，有政界中人估計，林鄭藉此再次暗示下屆唔選特首，優哉游哉退休去。
其實林鄭有感而發，可能係與同場嘅天主教香港教區主教湯漢樞機發言有關，皆因湯漢話任何事情能否成功，往往唔係人嘅掌握之內，最重要堅持以謙遜態度接受天主嘅試驗，大讚林鄭有永不言棄嘅毅力同承擔，可能感動到林鄭吐心聲。
立法會主席曾鈺成則喺另一場合出言安撫林鄭，佢話林鄭係堅持做對的事嘅好榜樣，指佢抵受各種壓力依然有好表現，係特區政府發展嘅希望，讚林鄭長期有傑出表現，呢方面市民有目共睹嘅。
李八方
mailto:[email protected]