財經界有唔少運動健將，46歲嘅漢能（566）財務總監林一鳴係其中之一。佢噚日喺大嶼山欣澳參加由香港三項鐵人總會主辦嘅「香港人壽ASTC三項鐵人亞洲盃2015」，要游750米、踩20公里單車再跑5公里，最終佢以1小時52分完成賽事，同組別冠軍則以1小時8分完成賽事。
林一鳴坦言，去到佢呢個年紀，玩三項鐵人，只係志在參與，完成到就算，攞唔到獎盃都冇所謂。而佢真係好熱愛運動，跑齡超過廿年，以前主要跑馬拉松，後來覺得跑到悶，2013年開始玩埋三項鐵人，至今已經參加過6個三項鐵人賽事。
其實睇佢手腳結實嘅線條，加埋逼爆胸肌，一望就知道佢係運動型喇。