財經專欄作家，獅子山學會嘅孫柏文原來去咗將軍澳競選做區議員，左丁山睇報紙先至知，覺得奇怪囉，以瘦仔孫（因意外入院，痊癒後順勢減肥，現在大概只有以前一半嘅身材）嘅自由市場立場，在民粹當道嘅香港，邊有得企呀？聽講佢嘅一項政綱仲話要對將軍澳出九龍隧道在繁忙時間向私家車徵收更高嘅隧道費，以求減少私家車流量，降低交通擠塞。咦，咁嘅方法，係正宗市場派先至會夠膽講嘅，即使係環保團體平時大大聲要求降低排放，一講到以價格限制消費，保障節能，環保份子都閉口不言嘅啦。
孫柏文咁樣公然主張將軍澳隧道在繁忙時間加價，以貫徹「差異價格」（differential pricing）理論，夠膽，值得鼓掌，但啱唔啱選民聽呢？左丁山都唔知道佢在邊個選區參戰，如果佢選得到，賠率可能高過佢有份嘅第五班馬「樂家將」贏馬。
好似左丁山孫柏文呢類市場派資本主義派好易俾左傾干預派鬧餐懵，香港還有些人鍾意反美，反美即係反資本主義，反世界警察，反美國文化霸權，但佢地有樣反得過龍，以為凡是敵人的敵人就是朋友，於是委內瑞拉、古巴就係值得支持嘅國家，理得佢地壓制新聞自由、壓制人權、踐踏司法獨立吖。此乃左傾人士最矛盾之處。
上星期二講委內瑞拉，當日就有委內瑞拉「司法笑話」爆出嚟。2014年二月，委內瑞拉馬杜羅總統要鎮壓反對派示威，大罵示威策劃人之一、反對派領袖 Leopoldo Lopez煽動羣眾使用暴力，後來拉咗Lopez，控以煽動暴力罪，件案一路審到今年九月，法官相信兩名控方專家證人，將Lopez重判坐監13年。究竟有乜證據入罪？就係靠兩位專家作證話，Lopez多番演講及在社交網絡嘅評論，雖然叫人非暴力（nonviolence）示威，但講詞內裏含義就係宣揚情緒式反政府行為。如果用同樣方法，香港特區政府或者可以將戴耀廷送上法庭！Lopez不服上訴，令人震驚之事發生了，兩個檢控官之一位Franklin Nieves突然與家人失蹤，跟住在互聯網上出現，佢現身video指控政府政治壓力龐大，使用假證據，要檢控官聽命令行事，懇求委內瑞拉檢控官及法官勇敢地站出來說明真相。佢自己就好似電影橋段咁，與家人逃亡海外，去咗邊？美國囉！委內瑞拉總統就係活生生示範何謂行政主導，總統地位超然，指揮司法系統嘅最佳例子。