深水埗巴域街一排唐樓正等候清拆，人去樓空，即成流浪貓樂園。據說，街貓大多短命，活不過3歲。生病無藥醫、被車輾斃，甚至遇上貓殺手，死於非命。月前，兩隻街貓就被人在福榮街舊樓天台擲下，當場慘死。血淋淋的照片，激起一陣民憤，殺手沒捉到，就似從未發生。在外流浪，九條命的貓咪，只得各安天命。記者連日跟隨群貓會義工，見證貓星人迥異命運，有絕育後重回街頭，也有成功上樓，成了嬌貴家貓。貓臉歲月，有悲有喜。
要尋訪貓蹤，就要走進舊區。石硤尾舊區重建，老店關門，位於巴域街的6層高排樓，正等待清拆。人去樓空，貓咪進駐，成了流浪貓樂園。「喵喵！快啲出嚟飲水！」附近仍未關門的茶餐廳燈火通明，廚房阿姐拿着小水兜來到後巷。幾隻花貓聞聲探頭自簷篷頂四出張望，發現陌生記者，貓步驟止。「街貓一定要有高警覺性，唔係死咗都唔知點解」，同行熟路義工解釋。
一傘成貓咪避雨亭
除了面臨重建的舊區，大型屋邨也是街貓樂園。記者跟隨義工來到上水，甫入邨，映入眼簾的，是一角的「貓咪避雨亭」。
「把遮係附近啲街坊放喺度，呢排成日落雨嘛」，義工Lily說。一把傘、一個殘破貓兜，很簡陋，卻為餐風宿露的街貓遮風擋雨，成了含蓄又溫暖的城市一景。Lily說，公屋禁養狗，沒人投訴，保安員也就隻眼開隻眼閉，人和貓，總算可和平共處。
有人愛貓，也有人恨貓入骨。群貓會幹事陳靈怡謂，協會成立前，正值連環貓殺手肆虐，3隻小花貓四肢被扭斷棄置旺角後巷，觸發愛協懸紅、5,000人上街、港府修例加重虐畜刑罰。只是十年過去，兇手仍逍遙法外，「試過執過一隻無頭貓屍，連內臟都被掏空」。根據警方資料，虐待動物呈報個案兩年間暴升一倍至120宗，由斷水斷糧演變至火燒、滾水燙，甚至斬手斬腳，手法越趨殘酷。
60義工照料110隻貓
「每隻貓都有唔同性格，入住貓會等待領養嘅，大都溫馴。有啲貓比較惡，係假設虐貓嘅人冇咁易埋到身，治理後都放番原處」。位於土瓜灣的群貓會，現時暫住了約110隻等候領養的流浪貓，「靠60個義工輪更，除咗清潔餵食，仲要帶貓咪睇醫生」。左前腳懷疑被捕獸器所傷的流浪貓「花無缺」是其中之一，被發現時傷口生滿蛆蟲，須即時截肢保命，「留醫兩星期先出院，做咗三腳貓，但總算可照顧自己」。
接收受傷街貓返回協會接受治療，陳謂只是中轉站，「暫養嘅數目已經係極限，我梗係希望啲貓有個好歸宿，有人錫唔使再流浪」。本身做出入口工作，小妮子笑謂已7、8 年未正式出外旅行，甚至放假，「放工好放假好，都喺嚟貓舍，講真我唔係特別偉大，係騎虎難下，好在有班義工同自己一齊儍，我都唔想講做得幾多得幾多咁老土，但除咗咁講，我唔知仲可以講乜好。」貓奴說。
攝影：何家達 記者：呂麗嬋
