跑完今期(11月1日)快活谷日馬，柏寶、莫雷拉、潘頓、史卓豐和巫斯義將齊齊趕到機場，前往澳洲角逐墨爾本盃，柏寶和潘頓都是地道澳洲人，自然好恨在家鄉揚威，兩人難得手執惡馬，竟然先在晨操期間先打牙骱戰。
平日作風低調的柏寶罕有地，先撩起火頭，事關其座騎「邦迪海灘」服役5戰取得2冠3亞，入Q率達百份百，包括個半月前在英國聖烈治大賽跑獲亞軍，但3歲馬初次遠征澳洲，當地不少莊家認為馬兒輸蝕成熟程度，但柏寶就大唱反調，他說：「佢今仗只負約115.5磅，幾乎係全場最輕，而且實力肯定未見盡。好多人話潘頓隻『成名遊戲』好有機會，但佢要負約125.4磅重咗啲，除非呢隻馬有此賽前冠軍『戴花』咁勁，但幾乎又未必有囉。」
柏寶有柏寶講，但潘頓睬你都傻，狂讚「成名遊戲」在考菲爾德盃後上凌厲追入第6名後，狀態正不斷提升，而且心腹大患「蒙古可汗」因絞腸痧退出，少個勁敵，捧盃更具信心。
墨爾本盃之前，兩人喺快活谷日馬第6場先鬥一番，「白玉凱旋」同柏寶最夾，上仗同程一哩人馬贏得精彩，今次留喺四班負123磅仍輕鬆，加埋個一檔，難怪柏寶話隻馬仍然好惡，有力連捷。而同場潘頓隻「安闖」日前試閘雖跑包尾，但潘頓話當日過終點後他稍稍推騎，隻馬即有反應湧上，遲熟法國自購馬已開始適應香港環境，所以亦有一定信心喎！