最近睇咗幾套青春電影，令我諗起好多那些年嘅嘢，不過大部份係足球嘢！
《王家欣》套戲大部份時間都係講俊賢點樣尋找王家欣，最中自己情懷係佢點樣鍾意咗戲院賣飛嘅王家欣！係，只係一晚嘅幾句對話，就鍾意咗！之後其實佢哋冇再相見，但俊賢嘅愛意就越嚟越濃，原因就係我哋青春期腦袋入面嘅無限想像力，只要你畀到個影像我，我就可以無限放大！你記唔記得你第一眼鍾意愛隊嘅原因吖？正路係因為某位球員、某個入波、某場大勝，亦有啲係因為件波衫、因為個會徽；我當年初戀鍾意咗嗰隊波，係因為阿10號仔個姓同我一樣，好有親切感，小學嗰陣又點會諗到馬勒當拿唔係姓馬吖，冇錯就係咁幼稚。
《我的少女時代》入面好重要嘅動情道具，就係林真心嘅偶像。有時你鍾意一樣嘢，需要有好多用錢買到嘅嘢去不斷提醒自己嘅。你鍾意詩情畫意，可能冇人知你噏乜，但鍾意劉華就簡單好多啦。知道咗你鍾意乜動情道具，想𠱁你嘅可以點唱畀你聽、買公仔畀你，甚至扮佢𠱁你笑；朋友送禮物畀你又方便，而你收得多當然又更加愛啦。我懷疑強隊之所以係強隊，同佢哋出得夠多、賣得夠多動情道具有直接關係。
《同班同學》都有共鳴，唔係鍾意三位少女嘅爭仔橋段，亦唔係掛住搵錢嘅早熟心態，而係同好之間嘅技術交流；不過，同班同學係開房，我哋麻甩仔係開波啫。後生細仔經驗有限，除咗閂埋房門睇video練習，隊友之間分享心得係好重要嘅──點樣斬波斬得遠啲，點樣直開角球入網，甚至點樣喺石地場嘗試倒掛金勾而唔會撻餐死。仲記得當年聽見個friend點樣喺龍門口福至心靈用後腳入波，可惜有啲嘢講就好易、做就好難，惟有喺大銀幕下幻想當做咗。
KEYMAN
節目主持