中學同學Y與太太回港探親，同班同學與Y君夫婦共聚，於10月26日在上海總會吃晚飯，來了十多人，想不到一位80歲的老師也有同學找到，請他前來，共談少年輕狂事。這位老師P是教算術和數學的，左丁山可能係班上成績最差嘅，五年中學讀數，從來只係僅僅及格，呢晚見到阿Sir，冇說話好講，不過班上模範生梗係同學Y啦，佢當年與左丁山一齊讀中六，入咗浸會書院物理系，讀咗一年就移民加拿大，之後未見過，呢次有機會重聚，梗係問清楚狀況，原來佢到咗加拿大入聖瑪莉大學，然後到多倫多大學研究院，取得物理學博士學位，依家還在美國密芝根州一間公司做研究顧問。問佢點解選讀物理？Y君答：「中學時覺得物理好難，唔多明白，我諗住要向難度挑戰，係要克服佢，於是主修物理。」咁都要有天份嘅啫，左丁山中三時上物理堂，連簡簡單單嘅specific gravity都冇法子搞清楚，一見物理學就怕怕，中四就轉讀文科，邊有膽向難度挑戰呀！
Y君讀書時已係馬迷，那些年在旺角街頭，字花檔、外圍馬檔林立，買外圍馬易過鬼，Y君沉迷刨馬，用筆名梁錦恩參加「明報」之馬迷貼士大賽，一季下來總結成績，梁錦恩攞到第三名季軍獎，「明報」頒獎俾佢，先至發覺佢係一名中三學生，大吃一驚。有一次上堂聽班主任Miss N教英文文法，突然間有一位女士推開課室門走入來向班主任投訴「梁錦恩」在家讀馬經多過讀書，以致成績差，講到眼有淚光，嚇到全班同學靜晒。Miss N好言勸走女士之後，叫「梁錦恩」放學後留低傾偈，佢地傾乜，同學們冇人知，只知道下學期考試完畢，一向成績平平無奇嘅「梁錦恩」居然大躍進，好似係考到全班第三名，充份顯示呢隻年輕新馬潛質優厚到極，一操即起，正是3歲定80，唔怪得佢去到加拿大之後，攞學位似斬瓜切菜。
事隔多年，左丁山多口問句：「你留港期間，想唔想去跑馬？」Y博士答：「想咗好耐，要去睇吓香港世界級賽馬。」因時間緊迫，第二日即刻叫快活谷常客肥仔K打電話去訂枱，唉所有廂房爆晒棚，只有快活谷看台有位。問吓肥仔K點解，肥仔K話：「快活谷看台比公眾棚還有不如，自助餐又差，睇馬又唔理想，所以度度爆晒，快活谷看台還有空位！」冇法啦，臨急臨忙，係咁嘅嘞，今日帶Y博士到快活谷跑馬，如果贏馬就再食過靚嘢嘅唧！