練馬師大摩證實，旗下高達115分之一班馬「活力歡騰」，將於11月8日出戰1800米三級賽婦女銀袋賽，鞍上人是潘頓，但就冇提到點解肯將潘頓解凍。
潘頓與大摩曾幾何時是好拍檔，曾經憑「軍事出擊」合作勝出2013年新加坡新航國際盃，但亦因為「軍事出擊」喺2014年1月，潘頓策「軍事出擊」連輸第四場，響董事盃姍姍來遲梗頸四後，大摩便一直棄用潘頓，至今已接近兩年沒有交收。
潘頓說過與所有練馬師都是朋友，樂意為他們效力，包括兩位阿John冠軍級練馬師大摩和蔡約翰。向來亦不用潘頓的蔡約翰，上季突然彈隻「戰利品」予潘頓，結果人馬贏得打吡。今次難得獲大摩提供「活力歡騰」，自然是馬圈熱門話題。「活力歡騰」雖然未必有一、二級賽實力，但過去兩戰田草1800米全勝，此程實力極強，而且婦女銀袋賽上限115分馬參加，「將男」、「喜蓮巨星」等此程好手都唔合資格報名，間接令「活力歡騰」機會提升。
兩個大馬房告東尼、蔡約翰今季都冇馬畀潘頓騎，早前潘頓更得罪埋沈集成，加上潘頓自己體重問題，莫講話挑戰雷神，二哥地位亦難保，如今有望重泊大摩碼頭，總算大好消息。