噚日係萬聖節前夕，唔少英超球隊都拍片應節，講震撼度，新特蘭嗰條就最好睇，丹尼格拉咸同史提芬費查扮鬼嚇隊友，魯迪維爾等個個都被嚇到尖叫！講最冇癮，就肯定係曼城嗰段，球會搵咗個人扮鬼嚇班球星，點知幾乎冇人驚，赫特仲撩番隻鬼傾偈；好在，新兵小將柏德列羅拔士都被嚇到O晒嘴。史雲斯就講溫情，一班球員扮鬼去探訪學校。