今日係哈囉喂嘩鬼節，早前砵典乍街之石板街一段，已經滿佈外國人，向攤檔買化妝用品，扮鬼扮馬，本來怕鬼係人之天性，但在商業市場推動下，美國流行嘅嘩鬼節都可以變成係趣味潮流，成為消費娛樂項目，認真好玩，令海洋公園與迪士尼樂園、蘭桂坊、蘇豪區等地方多賺一筆。據海洋公園一啲消息人士講過，不少外來遊客專程來港到海洋公園參加嘩鬼節活動，香港可能係亞洲最有活力之「嘩鬼節城市」！鬼唔係咩，前海洋公園主席盛智文係可以玩到癲嘅幽默鬼，為咗推廣，佢扮殭屍瞓棺材都制，邊度有得頂㗎，盛智文之前嘅主席陳南祿係音樂玩家，但扮鬼就咪攪，現任海洋公園主席孔令成有名俾你知，係孔夫子一族嘅後代，正是「敬鬼神而遠之」，本身又係大賓架，點可以扮鬼入棺材吖。
之不過，孔令成在盤谷銀行服務，盤谷就是Bangkok，孔大哥個人唔扮鬼啫，大可透過盤谷銀行在泰國無人不識嘅人際網絡，每年為海洋公園加插泰國殭屍節目，必然吸引到極。泰國電影之中，有好多非常賣座嘅猛鬼片，如Nang Nak，泰國人對鬼片十分愛好，女鬼故事可以拍完又拍，改編無窮，由孔令成大哥出面搵一啲泰國著名女星到海洋公園扮Nang Nak，必然可以收旅客分流之效，吸引泰國遊客來港。
一位旅遊界人士透露，佢地發覺在非內地旅客群之中，南韓人與泰國人最鍾意常來香港，即願意成為「香港常客」，好似香港人成為東京、曼谷、首爾常客一樣，究竟佢地鍾意香港邊方面？哦，南韓人認為香港係一個浪漫城市，拍拖勝地，上山頂睇維港夜景，晚上坐叮叮電車漫遊港島區市中心，漫步街頭，有說不出的浪漫情懷。左丁山日日在中環，只緣身在此山中，不識真面目，當然不知浪漫在何處，但南韓遊客就有唔同想法。
另外泰國人呢？泰國人為旅發局拍一套宣傳短片，在泰國播出，據講幾吸引泰國人來港一遊，套短片特意捕捉香港地鐵站晚間深宵之氣氛，呈現一種陰森感覺，好似彎曲管道內隨時有靈異怪事出現咁款，香港人未必認同如此，泰國人就認為好有味道，可能係泰國人喜歡睇鬼片之故；既然如此，每年十月尾，香港旅遊局大可展開一個「美酒佳餚見嘩鬼」嘅活動，吸引遊客呢喂！