校園時代的青葱歲月，你還記得嘛？當年自己的宏大理想，有否兌現了？新片《哪一天我們會飛》，帶我們坐上時光機，回到那段屬於你我的美好時光，勾起早已被殘酷現實吞噬的「夢想」。從姓名學角度來看，有時「名字」跟「夢想」多少有點相互關係。
撰文：譚倩宜
黃修平跟楊千嬅早前為電影《哪一天我們會飛》在九龍灣接受本報專訪，電影借兒時夢想讓我們細味年輕時那份羞澀的流金歲月，千嬅邊分享着其兒時夢想邊說：「我好想做醫生，可能細個成日肺炎，喺藥水邊緣度生活，所以有呢個概念放喺心入面。但讀書時因為我理科差，數學從來冇及格過，不過文科成績就好好，所以就拎住生物一科，希望可以考到入醫院做護士，最終真係實踐到。」之後千嬅向着另一個歌手夢想出發，花了5年的時間，最終成功登上期待已久的紅館舞台，她說：「以前我嗰個年代，喺紅館開騷係一個好高嘅標準，好幸運自己可以完成到，因為好多人都唔知可以點去實踐自己嘅夢想。」
黃修平則透露兒時夢想全職砌模型，直到中學時的一個夢，令他意識到自己有掌鏡拍電影的可能性，他說：「仲記得個夢係藍色，有一班唔知乜人喺度打泥漿摔角，當時我唔知個夢乜意思，但就係我同朋友講起呢個夢時，我第一次講想拍嘢，將呢個夢拍番出嚟。」
源自《愛的根源》
俗語有云「唔怕生壞命，最怕改壞名」，戲名有時主宰觀眾的入場欲，《哪》片原名《愛的根源》，跟譚詠麟名曲同名，經不少於10次的修訂之下，才得出現在的戲名。戲名一改再改，導演亦不時記錯，他笑說：「我同監製陳心遙睇完郭子健一套以張國榮歌名命名嘅電影，佢就忽發奇想，想寫套戲以譚詠麟嘅歌出發，戲內亦會用《愛的根源》呢首歌，我本身好抗拒用愛字行頭嘅嘢，覺得成件事好老土，但因為呢首歌，我覺得老土得起。」
後來劇本更改，電影亦選用另一歌曲，故導演棄用最初的片名，其後便出現《隕石旁的天際》、《差一點》、《差一點我們會飛》等多個片名，黃修平笑說：「本身覺得《差一點》呢個名幾好，但因為個『差』字，電影公司怕影響票房，所以就改，最終用《哪一天我們會飛》呢個名，我覺得好切合，同埋我用口字邊呢個『哪』，係因為呢件事係問句。」
三級片名最啜核
一個啜核片名絕對能留下深刻記憶，要求兩人即時答出印象最深刻的一齣電影片名，結果回覆令人噴笑。黃修平說：「純粹計個名，最記得都係三級片嗰啲，佢哋嘅睿智真係好叻，林海峰應該好叻改呢啲戲名，因為戲入面有啲對白都係佢創造出嚟，佢係一個好有創造性嘅演員。」問到哪齣三級片名令導演印象如此深刻？他靦覥笑說：「都係朋友同我講，《插班女學生》，最正係冇一個字夾硬嚟，每一個字都好啱。」
不過一山還有一山高，千嬅爆出一句說：「《抬起我的頭來》，啲fans見到影低send畀我嘅，所以印象咁深。」此名大概只會聯想到千嬅的同名歌曲，但她解釋說：「係電影，喺油麻地好hit嘅，我都冇諗過自己歌名可以做鹹片名，覺得好犀利，但我諗一陣又覺得好啱唔夾硬，仲要啲歌詞都用到。」千嬅坦言令她最驚訝的，不是自己的歌名變成三級戲名，而是當年入場欣賞此片的觀眾：「當年啲人同我講，畀幾十蚊入場就可以睇全日，十幾個鐘淨係睇鹹片，其實呢件事都幾疲勞吓，好瘋狂吓呢件事。」
戲名越長越深刻
再要二人選出印象中最難記得的電影名，千嬅先答：「『那夜凌晨我咩紅VAN』（《那夜凌晨，我坐上了旺角開往大埔的紅VAN》），呢個真係比賽級問題，同埋『致逝去我們』（《致我們終將逝去的青春》），印象深刻，但就係講唔到個名。」黃修平在旁則表示：「最記得同最難記嘅都係岩井俊二嘅第一套戲，叫《煙花》，而佢嘅日文原名係《向上打的煙花應該抬頭仰望還是從側面觀看》，我覺得係超級有詩意，而成套戲都係問緊呢樣嘢。」
場地：E-Max
楊千嬅 服裝：Christopher Kane
化妝：Ling Chan of ZING the makeup school
髮型：Vic_Kwan of ii Hair & Nail
【向宮崎駿學飛】
黃修平是標準日本動畫大師宮崎駿迷，所以在《哪一天我們會飛》不難找到宮崎駿的影子。戲內男主角特製的滑翔飛機，就跟《魔女宅急便》中很相似。他指宮崎駿的作品對自己有極大影響，前年有幸聲演偶像的告別作《風起了》，又有機會跟對方見面。他特意以畫紙列印《風》片內的飛機，於機翼上寫上答謝的字句交到宮崎駿手上。他說：「我畀佢嗰時，佢第一句就問我：『你架飛機飛唔飛得？』我當時完全冇諗過架飛機係要識飛，佢同我講話一眼就睇出我架飛機飛唔到，嗰刻令我好慚愧，我太過輕視宮崎駿對飛機嘅執着。」
見識過宮崎駿的執着，故黃修平做了更多的資料搜集，對飛機鑽研得更加深入。黃修平又指在電影開拍前曾到加拿大旅行，當時特意試飛滑翔翼，他說：「飛之前望住張生死狀真係腳軟，但當我見到有個媽媽級都輕輕鬆鬆咁就飛咗上天，所以自己都鼓起勇氣飛，當我成功飛到上天嗰陣，種感覺真係不可言喻。」
