【澳門】因為洪永城一句戲言「我對佢付出咗無限咁多嘅愛，好可惜佢最後揀咗Edwin（蕭正楠）！」，觸發網絡潮文「我諗每個男人心裏面都有一個黃翠如」席捲全城，就連黃翠如也要為好兄弟自度咗另一篇潮文回應大家嘅心意，真情告白「她也找到了她的他」明示自己已經心有所屬，向男友蕭正楠派定心丸。洪永城就知衰表明要為唐詩詠擺和頭酒，翠如BB更進一步，玩人肉速遞到澳門撫慰蕭正楠的心。
越食越投入
讀者鄭小姐昨日透過本報「爆相爆片」報料，指前日傍晚時分，見到翠如BB去咗澳門，約會正在當地拍劇嘅男友撐枱腳食飯。鄭小姐形容翠如BB同蕭正楠幾sweet，不過，佢哋警覺性好高，好似專登揀坐喺一啲外國人同老人家附近，慢慢放鬆心情之後，傾到不知幾開心，有時講到激動位就指住手機，相中見到翠如BB仲餵蕭正楠飲嘢，成餐飯都食得不知幾咁溫馨，相信潮文對佢哋冇乜影響。佢哋短聚半個鐘之後由蕭正楠埋單，即刻有兩個女仔乘機衝上前搵翠如BB影相，不過翠如BB似乎被突襲嚇親，最終未有答應合照，由蕭正楠護送離開。
這邊廂翠如BB同蕭正楠如膠似漆，自認衰多口嘅洪永城前日就親自解畫，趁機補鑊話要擺和頭酒，仲話呢個只係一個笑話，冇諗過咁大迴響，佢話要趁呢個機會同被傷害嘅人講唔好意思，仲祝福翠如同蕭正楠，話佢兩個係好夾、好襯嘅一對。
採訪：非非