特首選舉維持1,200人小圈子，所以下屆特首候選人一定要四出與各界打好關係，盛傳係下屆黑馬嘅前財政司長梁錦松（圖），亦開始向社福界示好，八方噚日見到，香港社會服務聯會喺12月9日嘅總裁對談午餐會，邀請咗梁錦松做主講嘉賓，阿松以「管理企業和非政府機構的隨想」為題發表演說。
社聯話今次午餐會，歡迎社聯會員機構董事局成員同機構主管參加，大家都知當年梁振英當選特首，同爭取到社福界支持好大關係，社聯嘅宣傳品介紹阿松時，亦不忘大讚阿松加入「小母牛」、「惜食堂」，做咗唔少善事，八方諗如果阿松以冧得掂呢班社福界揸fit人，對佢爭取業界支持肯定大有幫助。