【狗仔出更】去年本報獨家直擊彭順與李悅彤（Liddy）同遊圓方，兩人又攬又咀，上完C1再上A1，全城轟動。事隔一年，Liddy早前出席活動表示，0依家有男仔追佢，但畀佢拒絕咗云云。
昨日傍晚六點左右，見到Liddy同一名身穿西裝褸及牛仔褲嘅斯文男，現身銅鑼灣時代廣場，而Liddy打扮與去年「圓方事件」差唔多，都係黑框眼鏡﹑恤衫﹑熱褲及波鞋，只係今次多咗頂帽。
Liddy同斯文男上咗連卡佛二樓睇男裝，當時男方專心揀恤衫及西裝褸，Liddy就坐埋一邊喺梳化玩手機，斯文男見到啲款靚時，有走埋去問Liddy意見，其間仲隱約聽到男方叫Liddy做「老婆」，揀咗半小時後，由男方埋單，離開時斯文男輕搭Liddy膊頭，而Liddy亦笑晒口，幫男方拎戰利品，搭扶手電梯時，斯文男仲疑似輕摸Liddy大髀，兩人似乎甚熟落。
之後兩人到時代廣場食通天其中一層，撐枱腳嘆意大利菜，兩人喺門口排隊等位攞飛，唔知講咗啲乜，好似有啲面左左，不過好快冇事。醫飽肚後繼續行街，其間兩人唔係好熟路，Liddy想過馬路時，斯文男捉實佢玉手行返行人路，相當細心，男方先陪Liddy去買化妝品，並由男方付款，然後兩人再去白沙道睇波鞋。
斯文男試咗約廿分鐘左右，揀咗幾對鞋，最後扑槌買咗一對，買完鞋兩人就行返去銅鑼灣皇冠假日酒店，唔知去酒店做乜呢？
《蘋果》致電Liddy，問佢係咪拍拖？Liddy表示：「普通朋友，行街啫。」見到兩人上酒店？Liddy則解釋：「飲嘢啫。」 問到斯文男係咪追你？有冇發展機會？Liddy就話：「唔知係咪追我，冇諗呢個問題，0依家對感情唔係好確定。」係咪有陰影？佢話：「唔係咁信愛情，件事影響太大。」