【拆局】
政府昨刊憲宣佈港大校務委員會委員及中大校董會新校董任命，其中盛傳出任港大校委會主席的李國章未獲委任，而中大前校董會主席鄭海泉則再獲委任為校董6個月。有政、學界人士分析，今次任命，梁振英表面上似乎有讓步，但以梁性格相信一定撐到底，「除非有中央出手阻佢，否則佢點都會撐李國章做校委會主席」。
「越反對佢越係要做」
有高教界人士形容，今次梁只算暫時「輸咗一球」，他再任命鄭海泉，或許是想向中大釋出妥協訊息，暫時不再強攻中大校董會，「佢知道中大校董會唔選佢鍾意嘅人，冇得夾硬嚟」，但他相信梁「唔會放過中大」、日後仍會找自己人做校董會主席，「6個月之後佢又會諗方法捲土重來」。
至於今次刊憲未見李國章做港大校委會主席的任命，有政界人士相信不代表梁放棄撐李國章，「佢（梁振英）一向係你越反對佢、佢越係要做，而且梁智鴻任命到下星五先到期，佢仲可以出手」，他估計昨日未有刊憲，可能有些問題未解決，對梁會讓步不樂觀，「你睇睇佢點處理財委會創科局撥款拉布，你立會立布？我就任命楊偉雄做特首創新及科技顧問，仲入埋行會」，該政界人士稱，除非有中央高層出手叫停，「否則佢（梁振英）點都會撐李國章做校委會主席，我睇唔到佢會有絲毫妥協，佢呢次唔可以輸，否則好難向支持者交代」。
■記者莫劍弦