目前喺練馬師龍虎榜排第5位，乃贏得9場之徐雨石。石哥向來季初成績甚佳，原來喺對上三季，佢都可以喺頭兩個月（9月、10月份），贏得7至11場頭馬不等。
今季初石哥保持佳績之餘，用人亦顯得變化多端，同柏寶合作憑「喜利高」、「飛躍之駒」、「皇龍大師」、「創出商機」贏得四win，又用雷神搏殺勝出「神舟小子」，當然唔少得益自己徒弟黃皓楠，為「故事」、「大把世界」出擊得手。甚至人哋徒弟女將蔣嘉琦，石哥亦重用佢，幫「頌友」建功，可以話知人善任。
好嘞，今期快活谷日馬，係踏入11月份首戰，石哥第二場嘅「上浦勇將」上仗得季軍，今次用田泰安排3檔，會有唔少人留意；而第五場皓楠仔座騎「銀飛龍」亦係近績佳兼今仗檔利嘅馬；仲有第10場配霍勵賢嘅「中華寶貝」，3戰同程谷草1200米獲兩勝，上述三隻馬，都會受到注目。
不過有個隱憂，大家不可不防。原來徐雨石係11月高危練馬師。2012年整個11月，只贏得「綠色快駒」1win，前年及去年11月又點呢？竟然又係均只贏1場，分別係前年「金紫荊」、上年「金瀛」。其實唔難理解，徐廐季季9月、10月都搏得咁盡，11月成績梗係急跌要回氣啦，所以嚟緊11月共8次賽事，買徐廐馬win之前，真係要諗清楚。