曾經喺泥地1200米攞過4冠4亞2季，蔡約翰馬房的「嫡愛」，馬主老友鬼鬼團體成員中，赫然包括金牌馬販派斯（Price, David Richard），佢引入嘅馬，能夠多捷幾乎已成例牌菜。此駒上季7月1日泥地一哩路程嫌長落第後，今季仍未復出，但健康其實絕對O.K.，而且更係操到火紅火綠嗰隻，只不過等合適賽程才跑。
睇番「嫡愛」9月25號試大閘得亞軍，走勢已不差。10日9日再試更勝出，亦反映相當有水準，因為同組出試跑第二之「一哥」，冇耐真正出賽已贏馬。到咗呢日（30日）「嫡愛」季內第三次試大閘，參加第四組1050米泥閘，同樣表現出色，在雷神胯下沿途居中後位置，轉彎發力外檔殺上，逢馬過馬，砌低另一匹FIT馬「盈利駿馬」掄元，狀態可以話無懈可擊，而季軍就是「魅力知心」。
雖然「嫡愛」一切已準備就緒，論馬隨時贏得，但可惜二班泥地1200米賽程，要等到12月6號先有，搞到金牌馬販都冇晒符，唯有喺12月初之前，先來一場熱身，不過「嫡愛」無論田草或谷草都例輸，真係得個跑字囉！