港大法律學院副教授戴耀廷（圖）噚日去浸大講talk，教大學生「行公義」。佢話教育都係行公義嘅一種方法，仲形容佔中嗰時，成個香港都係佢教室。佢諗番提出佔中後頭一兩個月，好多媒體搵佢做訪問，承認自己嗰時都有飄飄然，「我諗冇人想自己一世都寂寂無聞」。
佢又講番自己上大台講嘢會激咗，因為台下反應會將情緒推高，「大台好似《魔戒》隻戒指，係一個誘惑。」佢一直提倡要用民主方法實現民主，但都有失手嘅時候。佢透露，當學聯同林鄭對話後，佢曾提議喺佔領區搞電子公投，等佔領人士表態是否支持學聯同政府傾嘅方案，點知學聯反對，佢當時曾用學者身份壓班學生，「用我嘅影響力逼佢哋接受」，但最終都搞唔成，𠵱家諗番都覺得自己唔啱喎。