浸大60周年校慶宣傳片《我們都是浸大的》，詞曲、歌聲、製作、意境無一不是「世界級」，但繞樑一日即下架，連三日都捱唔到，認真可惜！98年傳理學院中文新聞畢業，𠵱家喺港台新聞部工作嘅周萬聰，睇完條片即時去信浸大校友事務處，強烈要求校方即時喺網上刪除呢條片，並取消一切於媒體或公眾場所播放之計劃，重新構思紀念校慶嘅拍攝方案。
周萬聰話，自己當年係浸大基督徒詩班成員，每年開學禮同畢業都獲邀獻唱，話呢條片「只能以災難來形容」，質疑點解條片可以出到街、上埋網，睇唔過眼一首記載大學昔日艱辛嘅校歌淪為笑柄，「作為校友，我真的一點也笑不出。」浸大向來視新聞主播為「出色」校友，周萬聰呢啲只在電台出聲嘅校友，唔知佢嘅意見校方會有幾重視呢？