近日facebook瘋傳有媽咪會派對搞手要求攝影師「贊助」拍攝，但只肯用fb嘅「like ＆ share」當「報酬」，攝影師唔制就俾搞手鬧到飛起。呢件事除咗網民鬧爆，亦成為好多攝影師之間嘅熱議，有攝影師話freelancer唔代表係free（免費）；據知近年好多品牌唔介意贊助呢類派對，先至縱壞班家長，將「贊助」當成「老馮」。
「受害者」被逼做埋阿四
去到噚日，又有攝影師Marcobilly Chong（莊先生），上載同一個BB派對搞手嘅家長對話截圖，呢個家長同45個家庭籌辦一個1歲BB派對，話用fb「like ＆ share」當報酬，莊先生唔肯，反建議每個家長畀100元，佢收$4,500接呢單job，點知個家長話佢斤斤計較，話咁樣點會有回頭客，做生意要有生意頭腦云云，之後不歡而散。
網民大多撐攝影師，件事亦喺好多攝影討論區、fb攝影群組廣傳，有攝影師話自己做過「受害者」，去過呢類「贊助」拍攝工作，結果要求多多之餘，仲俾搞手當「阿四」。有商界中人同八方講，呢幾年好興搞fb宣傳，好多呢類活動搵品牌贊助，唔少大品牌唔介意送試用品或贈品，結果搞到好多搞手以為「老馮」可以頴到「贊助」囉！
識睇睇留言
Lpt Lp：呢個啊媽。係咪香港長大㗎。影衰晒？
Kwunchung Chan：攝影師都要揾食架 大嬸!
Kevin Wan：自己做人生意就收足錢，叫人哋做嘢就唔俾錢，佢就真係識做生意喇！學下人哋啦！
Gap Mike：全部野免費，又點做生意呀？
Luke Raku：買100個like都系幾十蚊既事。你甘勁自己去影囉。講到個個都老馮幫人做野甘樣。唔洗開飯啊？
資料來源：《蘋果日報》網站
李八方
mailto:[email protected]