劇透度：★★☆☆☆
每套喪屍片，總有一班英雄，殺喪屍救美人，今次有幸做主角的，是一班童子軍。在外國，牛高馬大仲着童軍制服，被瞧不起事小，冇拖拍事大。兩個密謀脫離童子兵團的少年，打算瞞住老友，參與完露營就退役，怎料撞正高年級搞畢業派對，只好偷走出營地，入城玩個夠。齋睇中文片名《戇Scout打爆喪屍城》，就知城內有屍，點解爆發點解人傳人，電影沒交代。既然是cult片，有個源頭畀你睇已算bonus，唔通好似Discovery紀錄片，搵科學家做病理分析咩？
記者看三級版本，血漿同鹽花，當然是重頭戲。主角大命如徐子珊，是意料中事，拋頭顱灑熱血的部份，要演得好看，全靠喪屍演員。印象最深刻的，是男主角墮樓之際，扯着喪屍的巨龍，巨龍被扯斷一刻，男主角安全了，喪屍和全場觀眾齊聲哀嚎。導演沒欺騙觀眾，童軍有用上繩結等知識，屠殺喪屍。淨係用刀槍，咁嘅服務態度，點滿足獵奇意欲？童軍小隊利用考徽章學到的技能，好像玩《Dead Rising》般自製武器，殺個痛快，都算有心思，但期待已久的喪屍圍堵營地畫面，完全沒發生。片中的童軍帳幕，純用作交代主角之間的情誼，有點浪費。既然是童軍題材，更希望多點土炮的過癮武器，如帳幕骨架、煮食用具等，供主角發揮。
笑料到肉 劇情沒有大驚喜
鹽花方面，話晒是青春期男生，有食唔食，罪大惡極，就算對手是喪屍，都要過下手癮先安樂。童軍中有此損友，又怎會缺乏笑料？這位最佳損友，懶理屍橫遍野，被喪屍追九條街，仍本着狗公本性，與心儀已久的喪屍加一雙巨峯自拍，都算一絕！就劇情而言，片中伏線鋪陳得不錯，但沒大驚喜和說教，擺明博君一粲，好在笑料到肉，選角也合適。如果童軍個個靚仔，何愁被歧視？導演夠貼心，三個主角各有特點，有帥有瘋有肥，講時講，人物設定有少少似《醉爆伴郎團》。片中穿插一隻死唔斷氣的喪屍，也有《爆笑納粹喪屍兵團2》的影子，但死法不及納粹喪屍好笑，有進步空間。
現已上映：《戇Scout打爆喪屍城》
導演：基斯杜化蘭登
演員：泰謝爾丹、羅根米拿、柏德烈舒華辛力加、祖兒摩根
評分：75分
Profile：彭海燕
情迷cult片，怕人心更甚於妖魔，愛看鬼怪扭盡六壬，滿足低等需求。戰鬥格，看完電影忙於夢中奮戰，菜刀進攻，鑊蓋防禦，花生油放火突襲。
編輯：謝慧珊
美術：楊永昌