周日（11月1日）快活谷賽事已排位，邊個騎師座騎實力最強？唔使問又係雷神啦！佢係周日唯一騎足10場之騎師，而且逾半數座騎近績甚佳，於上仗拼入三甲，包括「甜哥兒」、「上浦猛將」、「鑽之友」、「勝利威」、「有心人」、「活力寶」；至於「會心微笑」季內亦贏過，呢批實力有保證嘅馬落入雷神手上，唔連場攞分就假咯！
其中練馬師沈集成今朝(29日)捉住雷神等騎師傾個唔停，動態異常緊張，今期佢同雷神合作第三場三班1200米嘅「上浦猛將」，隻馬季內三戰冠亞季各一，可以話大熟大勇，飛起騎開嘅梁家俊而換上雷神，戰鬥力可以話暴升，由上次11檔一下子移入4檔，今次真係跑第2都唔開心。
仲有第五場四班1650米嘅「會心微笑」，亦值得特別一題。隻馬季內四戰，三次用蔣嘉琦、黃皓楠、湯智傑，騎功差一皮，當然贏唔到，尤其上次湯智傑起步大慢閘，更加一出閘就輸咗，今次回配雷神，季內人馬合作一次即勝，完全係兩回事。
雖然雷神騎師王一定唔好分，但睇怕實食冇黐牙，唔好拗頸呀！