受零售市道轉差影響，莎莎（178）早前預告中期純利跌逾五成，但莎莎冇因此縮皮，減少宣傳開支，照舊同馬會合作，下月8日舉行第11屆「莎莎婦女銀袋日」。
莎莎老闆娘郭羅桂珍噚日着得靚靚出席記者會，最特別就係佢頂帽。莎莎今年特別邀請到英國頭飾大師Piers Atkinson參與活動，郭太頂帽就係出自呢位名師手筆。按Piers Atkinson網頁資料，頂帽售價990英鎊（約1.17萬港元）。不過呢頂帽只係噚日出場用，到銀袋日當天，郭太又會戴另一款帽㗎喇。
活動形象大使、台灣女星張鈞甯亦有現身，佢賣口乖，話一早知道香港賽馬刺激，喺台灣未有機會睇跑馬，好期待參與銀袋日咁話。