呢排幾多正碟出，愛煲碟嘅人應該唔得閒，《殺破狼II》、《未來戰士：創世智能》等藍光都有，碟舖老友昌哥陰陰嘴笑：「仲有套《加州大地震》，即係上次你使咗幾千蚊包場，睇到一半要離場嗰套呢。」昌哥又揶揄龍叔叔喇，其實並非套戲差到要中途離場，只係龍叔叔同龍嬸嬸玩surprise，電影播到一半插播求婚短片啫。當時龍叔叔緊張過對六合彩金多寶，套戲播緊乜完全入唔到腦，好彩最後龍嬸嬸都say yes咋。今次可以安坐家中，好好嘆吓龍叔叔極愛嘅災難特技片喇，就連有份參與surprise party嘅親朋戚友，事後都話半套戲唔夠喉，自行畀錢買飛入場再睇一次喎。
學黃子華話齋，人類特別鍾意睇人PK，所以災難特技片從來都咁有市場。顧名思義，災難同特技先係主菜，就好似《死神來了》系列咁，途人甲乙丙點樣排住隊輪流遇難，觀眾其實唔多關心，最緊要死得轟烈、死得燦爛。十年前有套《明日之後》珠玉在前，上年都有齣《颶風中心》拍到緊湊刺激感，不過只係圍繞一個小鎮發生，唔多夠PK喎！
炒起三藩市 蠍子王變神
今年嘅《加州大地震》就玩番大規模破壞，再唔係一兩個鎮仔嘅事，而係炒起成個三藩市。嘩，現今荷李活CG特技有乜做唔到吖？齋想像都好有畫面。不過《加》喺人物架構上就有啲唔同，編劇並無刻意合理化所有事件，雖然骨幹同《明日之後》差唔多，都係老竇唔要命四圍搵仔女，不過《加》並無過多枝葉故事，只需一個專家講解聖安德列斯斷層有幾麻煩、一個無人性情敵負責做衰人、再加一對四處逃亡嘅母女就齊腳。光頭大隻佬Dwayne Johnson由頭擔到落尾，直升機、四驅車、快艇等，乜交通工具都俾佢揸勻晒，大發神威加種種巧合，幾凶險幾大鑊都可安然度過，救世人於苦難，當年嘅蠍子王儼已升格成神。
都係嗰句，特技先係主菜，今次藍光碟嘅3D表現，的確增加唔少臨場緊張感。由於主題係地震，唔死人都要冧樓，一幢幢摩天大廈喺主角面前不停冧低，3D景深相當足夠，加上杜比Atmos豐富嘅環迴音效及強勁重低音，睇到龍叔叔腎上腺素係咁飆。視覺效果係勁到爆，不過嚟嚟去去都係嗰幾度板斧，不停冧樓畀你睇，最多玩埋海嘯衝擊金門大橋，冧樓冧成兩粒鐘，睇到後半其實有啲麻木。唔似《明日之後》咁可以玩吓冰封，又或《颶風中心》咁有火龍捲，《加》新意確有不足。猶幸收錄嘅bonus都算豐富，導演講評、刪除片斷同特技解構都有齊，孖碟版街價賣$250，OK啦。
Profile：
幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。
編輯：陳漢榮
美術：楊永昌