謝瑞麟珠寶（417）嘅靚太主席謝邱安儀噚日出席中期業績會，咪睇佢着住套黑色套裝好似好普通，其實佢全身戴住嘅鑽飾已經值450萬元，應該夠買一個「劏房」上車盤。
謝太噚日戴上一對鑽石耳環，襯一條鑽石鏈，再加兩隻離遠都望到嘅碎石鑽戒，簡單得嚟，夠晒閃！不過謝太點都唔肯透露鑽石嘅卡數。
謝太做慣生招牌，家陣零售市道轉差，佢以後可能要多啲現身，慳番啲廣告費呀。
佢指，𠵱家千幾至幾千蚊嘅首飾，較受歡迎；加上內地遊客減少，佢哋都要變陣，除咗多推優惠吸客，開新分店時，都會轉為考慮本地客較多嘅地區，例如鑽石山、黃大仙等。喺員工培訓方面，佢哋會專登教售貨員點樣招呼本地客。所以話，做生意真係要識變通先得。