浸會大學為迎接60周年校慶，搵咗逾百名唔同界別校友，明年初喺大學會堂搞歷來最大型校友Show。校方率先製作咗MV，由多個知名校友包括前TVB小花主播周嘉儀、蔡雪瑩等唱歌贈興，點知MV質素引起熱議，浸大校友事務處噚日突然將已上載YouTube嘅短片「下架」，由公開影片改作私人影片，金曲公開繞樑咗一日就bye bye咯。
名為《我們都是浸大的》嘅宣傳片陣容鼎盛，由「兒童合唱團之父」葉惠康做指揮，上鏡名人校友包括「超人」林超榮、音樂人黃志淙、名DJ梁繼璋、朱薰、阿Bu；多個傳媒人如周嘉儀、蔡雪瑩、呂秉權、柳俊江；食衞局局長政助陳凱欣同紀惠集團行政總裁湯文亮都冇吝嗇「世界級震音」。
但MV前日播出後，網上負評如潮，網民同校友無論對MV嘅製作質素、以致校友們嘅歌喉，都有好強烈意見，最多人不滿係詞曲嚴重唔啱音，有人就話key上學校背景好粗糙兒戲。八方聽聞，唔少校友噚日都有向校方表達意見，質疑MV「粗製濫造」，連業餘水平都不如。批評咁嚴厲，都係愛之深，責之切。
校友會擬重拍
校友群情洶湧，浸大從善如流。浸大校友事務處向傳媒稱，短片由一群唔同年代嘅校友構思同製作，原意係利用較輕鬆手法，帶出凝聚校友嘅訊息；而大學接到校友不同意見後，已從網上平台暫時抽起短片，仲話校友活動籌委會正研究製作新短片，並多謝大學社群嘅寶貴意見。據聞校友事務處去信有份參與嘅校友，話短片喺網上有好多意見，非常多謝校友幫手。
雖然為大家帶嚟唔少歡樂嘅短片已經冇再上載於公開平台，但網民「挽歌之聲」巴打就幫條片重新配上「正確歌詞」並上載；想一睹眾校友唱「正確」歌詞嘅風采，可以去呢度 http://bit.ly/1Mk6ApL 睇睇！
李八方
mailto:[email protected]