一班曼聯WAGs禮拜三入奧脫福撐場，結果見證隊波主場同英冠嘅米杜士堡踢到加時都互交白卷，最後仲喺互射12碼輸埋，英聯盃16強出局。唔通呢班女人太「黑腳」，邪親曼聯？呢個當然唔係理由啦，領隊雲高爾賽後直斥隊波近期把握力極差，雖然佢冇開名，但係人都知鬧緊隊長朗尼。
迪比擔正繼續「毒瘤」
喺呢場英聯盃八強，曼聯主場對英冠嘅米杜士堡，朗尼初頭同安東尼馬迪爾一齊坐後備，睇吓占士威爾遜、安達斯彭利拿、連格同迪比呢班副選表演，點知上半場攻唔入米堡。作為隊長，朗尼下半場即刻入嚟幫手，但越幫越忙。直至馬迪爾入替迪比之後，曼聯進攻先正常番啲。完場前，連格有次黃金機會，但射中條柱。曼聯喺法定時間同加時都攻唔入米堡，兩隊要以12碼分勝負。
朗尼又嚟零射門
由下半場到加時，朗尼都踢咗75分鐘，但呢位中鋒竟然一腳射門都冇。呢次冇晒對手後衞「掩掩揚揚」，仲擺定個波畀你射，點知朗尼操刀首輪12碼被撲出。喺朗尼「以身作則」之下，卡域克同艾舒利楊格都喺之後射失，得彭利拿射得入，最後曼聯喺互射12碼以1:3落敗，步車路士同阿仙奴後塵，緣盡英聯盃16強。有網民馬後炮話，搵班英格蘭國腳出嚟射12碼，輸都係好正常；同埋曼聯近四次互射12碼都係輸晒。
雲高爾賽後好失望：「我哋要諗辦法解決呢個問題。對曼城係咁，呢場又係咁，我哋需要把握機會去入波。好多球員都有埋門機會，但就係射唔入。」隊波把握力出問題，踢中鋒嘅朗尼當然第一個要孭鑊，但雲帥就補多句：「唔係話個別球員，係好多球員都係咁，所以我真係好苦惱。」我求大俠就話，雲高爾你唔使淆喎，大把魔迷等到頸都長，就係等緊你下場收起朗尼！
曼聯都出埋局，最開心嘅梗係曼城，佢哋周三大勝水晶宮5:1晉級，但有薩巴列達觸傷膝頭舊患離場。三大爭冠勁敵冇晒，曼城下輪對英冠嘅侯城，難怪冠軍賠率得1.65倍，熱到辣手！
