高路普終於開齋喇！上任頭三場波全部和局收場之後，利物浦喺周三英聯盃16強青春爆發，一班後生仔獲委以重任，結果亦幫高帥攞到首捷，主場1:0小勝般尼茅夫晉級，周六英超作客車路士，氣勢上先贏對手。
高路普話喺預備組睇過班小將有唔錯嘅表現，唔畀機會上一隊踢吓就太可惜，結果喺周三場波有一半正選都係廿歲左右嘅年輕人。難得有機會落場，一班後生仔喺球場上盡情享受比賽，祖奧泰斯拿喺17分鐘入楔禁區一記後腳踭射波，雖然被對方守將阿當史密夫白界前解圍，但仲有後上嘅尼達利基尼補中，射入奠勝一球；佐敦伊比都有花招出賣，用重心腳交波呃晒對手；至於身價成2,900萬鎊，但一直都冇乜料到嘅新兵羅拔圖法明奴，總算喺今場波踢出代表作，賽後獲選為最佳球員，不過最無厘頭係，有個曾經因為持假槍襲擊他人，被判坐三年監。嘅罪犯法蘭治（Stephen French）竟然坐咗喺冇上陣紅軍球員席，坐喺馬馬度沙高隔籬。