立法會5樓議員活動室𠵱家擺咗唔少健身器材畀議員用，等大家唔飲鉛水都可延年益壽。最近秘書處諮詢議員後決定添食，整多套啞鈴同一部伸展式訓練機。
事緣平時打開拳嘅新同盟范國威早前要求秘書處喺活動室加座地式沙包，但大部份回覆秘書處嘅議員都否決，反而覺得應該加番部伸展式訓練機同啞鈴。
八方得悉現時活動室已有唔少設施畀議員用，包括跑步機、健身單車、滑步機等，但睇番秘書處嘅諮詢結果，呢啲器材使用率似乎好低，事關從來唔用嘅人數多過經常用或間中用。至於最多人用嘅係乜設施？咪就係梳化囉！唔知呢部可以鍛煉腿後肌、下背部、大腿內側、四頭肌嘅伸展式訓練機，使用率會唔會高一啲？